Dreifð hönnun þýðir það að hægt er að hanna hlutina nánast hvar sem er og hún býður upp á möguleikann að hægt er að framleiða hlutina staðbundið og minnka kolefnisfótspor vara umtalsvert. Samstarfsvettvangur dreifðrar hönnunar býður upp á að að viðskiptavinir geti fengið aðgang að gæða hönnun hann getur stækkað markaði fyrir hönnuði, skapara og framleiðendur.

Vörur sem við kaupum hafa iðulega ferðast þúsundir kílómetra áður en við fáum þær í hendur. Áður en vörurnar eru framleiddar hafa hráefnin líka gjarnan verið flutt um langan veg til verksmiðjunnar. Fjöldaframleiddar og staðlaðar vörur gefa ekki alltaf mikið svigrúm fyrir persónulegar þarfir og skapa ekki endilega atvinnu í nærumhverfinu. Er hægt að draga úr umhverfisáhrifum vöruframleiðslu, auka aðgengi að gæðahönnun og stækka markaðinn fyrir hönnuði, skapara og framleiðendur?

Um þessar mundir er hlutverk hönnuðarins að þróast og aðlagast nýjum, stafrænum heimi. Dreifð hönnun (e. Distributed Design) er ný nálgun þar sem leitast er við að hanna á heimsvísu en framleiða í hverri borg og bæ fyrir sig. Þetta breytir því hvernig vörur eru framleiddar og hvernig viðskiptavinir tengjast vörunum.
 
Markmiðið með Distributed Design Platform er að koma upp nýju kerfi þar sem framleiðendur á hverjum stað fyrir sig hafa aðgang að hönnun frá öllum heimshornum til að framleiða og dreifa eftir því sem þörf krefur. Þannig er hægt að laga vörur að þeim aðföngum sem tiltæk eru og breyta þeim eftir þörfum áður en þær berast beint frá framleiðanda til neytanda.
 
Distributed Design Platform er verkefni sem Fab Lab Vestmannaeyjar / Þekkingarsetur Vestmannaeyja á nú aðild að og er stutt af Creative Europe sem styður við gróskuna í starfi skapara og hönnuða með því að efla útbreiðslu og dreifingu á verkum þeirra, veita þeim tækifæri á alþjóðlegum vettvangi og beina athygli að þeim sem skara fram úr.