Á ráðstefnunni Flæði Framtíðar sem haldin verður í Hljómahöllinni í Reykjanesbæ þann 15. nóvember 2024 verður fjallað um áhrif og möguleika gervigreindar í þróun og eflingu nýsköpunar, sjálfvirkni og tæknimenntunar.

Markmið hennar er að varpa ljósi á hvernig tæknin er að breyta samfélaginu og skapa umræðu um hvernig við getum búið okkur sem best undir þær breytingar. Boðið verður upp á fyrirlestra og hringborðsumræður með kunnáttufólki á sviði tækni, fræða og fyrirtækja sem vinna með nýsköpun, gervigreind eða sjálfvirkni í sínum rekstri. Flæði Framtíðar er vettvangur fyrir fyrirtæki, samtök, menntastofnanir og einstaklinga sem vilja taka þátt í að móta framtíðina og stuðla að betra samfélagi.

FREKARI MARKMIÐ

• Fræða þátttakendur um hvernig gervigreind og sjálfvirknivæðing eru að móta framtíð nýsköpunar og vinnumarkaðarins.
• Kynna raunveruleg dæmi um hvernig gervigreind og sjálfvirknivæðing hafa verið nýtt af fyrirtækjum á Suðurnesjum og Íslandi.
• Sýna fram á hvernig tækni er notuð á Suðurnesjum og Íslandi til að styðja við nýsköpun.
• Rýna í hvernig menntakerfið getur stutt við nýsköpun og þróað hæfni nemenda í gervigreind og sjálfvirknivæðingu.
• Ræða hvernig menntun getur undirbúið frumkvöðla, nemendur og almenning fyrir tæknibreytingar.
• Hvetja til samstarfs milli skóla og fyrirtækja til að efla tæknilega hæfni og menntun á sviði nýsköpunar.
• Greina tækifæri fyrir fyrirtæki og frumkvöðla til að innleiða nýsköpun.